February Aitheantas breise faighte ag Ollscoil na Gaillimhe as dul chun cinn ar chomhionannas inscne

Tá Gradam Airgid Athena SWAN eile bainte amach ag an Ollscoil do Scoil Ghnó agus Eacnamaíochta J.E. Cairnes 

Tá gradam suntasach bainte amach ag Ollscoil na Gaillimhe maidir le cur chun cinn an chomhionannais inscne, agus Scoil Ghnó agus Eacnamaíochta J. E. Cairnes tar éis Gradam Airgid Athena SWAN a bhaint amach. 

Tá Scoil Ghnó agus Eacnamaíochta J. E. Cairnes ar an dara Scoil Ghnó i bPoblacht na hÉireann a bhain a leithéid de chaighdeán amach.

Tugann Gradam Airgid Athena SWAN aitheantas don tiomantas i leith comhionannas inscne a chur chun cinn don fhoireann agus do mhic léinn araon, agus i leith athrú cultúrtha aitheanta a chruthú laistigh den Ollscoil, agus bronnadh an gradam a aithnítear go hidirnáisiúnta mar gheall ar éachtaí comhionannais inscne na Scoile. Is dul chun cinn é ar an nGradam Cré-umha a baineadh amach in 2020.  

Mar thoradh ar an gcreidiúnú is déanaí seo tá deich nGradam Cré-umha agus dhá Ghradam Airgid bainte amach ag an Ollscoil go dtí seo, mar aon le Gradam Cré-umha Institiúide a rinneadh a athnuachan in 2021. Tá Gradaim Athena SWAN ag dhá scoil déag as ocht scoil déag de chuid na hOllscoile anois.  

            Dúirt Leas-Uachtarán Comhionannais, Éagsúlachta agus Cuimsithe Ollscoil na Gaillimhe, an Dr Helen Maher: “Déanann gach duine in Ollscoil na Gaillimhe comhghairdeas le Scoil Ghnó agus Eacnamaíochta J.E. Cairnes. Is mór an spreagadh dúinn an dul chun cinn suntasach atá déanta ag ár n-ollscoil i dtaca le comhionannas inscne, go háirithe i gColáiste an Ghnó, an Bheartais Phoiblí agus an Dlí – áit a bhfuil gradaim Athena SWAN bainte amach ag na trí Scoil ar fad.  

“Léiríonn an dara Gradam Airgid a baineadh amach inár nOllscoil go bhfuilimid dírithe agus tiomanta i gcónaí do chomhionannas, éagsúlacht agus cuimsiú a dhaingniú inár gcultúr agus inár gcomhfhreagrachtaí.”  

            Dúirt an tOllamh Alma McCarthy, Déan Scoil Ghnó agus Eacnamaíochta J.E. Cairnes:   “Tá ríméad orm go bhfuil an gradam seo faighte ag ár Scoil agus is léiriú é ar ár dtiomantas don chomhionannas inscne. Is dianphróiseas measúnaithe seachtrach é próiseas Athena SWAN a éilíonn fianaise ar ghníomh agus ar dhul chun cinn. D’oibríomar ar os cionn 50 gníomh comhionannais inscne chun an gradam Airgid a bhaint amach. Molaim mo chomhghleacaithe go léir as a dtiomantas don chomhionannas agus as ár luach a bhaineann le meas ar chách a léiriú.”

Críoch