February Lá spraoi teaghlaigh in aisce in Ollscoil na Gaillimhe do Sheachtain na nInnealtóirí 2024

Tá Ollscoil na Gaillimhe ag iarraidh ar gach duine, idir óg agus aosta, ar mian leo a bheith ina n-innealtóirí, páirt a ghlacadh in imeacht teaghlaigh saor in aisce an deireadh seachtaine seo.

Beidh ‘Innealtóirí na Todhchaí: Lá Spraoi Teaghlaigh’ ar siúl Dé Sathairn, an 2 Márta ó 10am go 4pm in Áras Innealtóireachta Alice Perry.

Tá an imeacht eagraithe mar chuid de Sheachtain na nInnealtóirí 2024, a dhéanann ceiliúradh ar an innealtóireacht ar fud na hÉireann, agus beidh neart seónna eolaíochta agus innealtóireachta, taispeántais scannán, ceardlanna agus gníomhaíochtaí praiticiúla ar fáil a spreagfaidh daoine óga agus aosta.

Mar aon le seónna beo, ar nós Fun Fantastic Physics, is féidir le teaghlaigh freastal ar dhá léiriú scannáin i rith an lae – Dream Big: Engineering Our World agus John Phillip Holland: Submarine Inventor.

Dúirt an tOllamh Jamie Goggins, Scoil na hInnealtóireachta in Ollscoil na Gaillimhe, gur innealtóirí nádúrtha iad leanaí mar gur breá leo rudaí a dhearadh agus a thógáil, ag baint úsáid as cibé rud is féidir leo a fháil: “Le heolas, nuálaíocht agus cruthaitheacht, athraíonn innealtóirí réaltacht agus todhchaí gach cine daonna. Ba mhaith linn an oiread teaghlach agus is féidir a bheith páirteach linn le haghaidh imeachtaí an lae chun Seachtain na nInnealtóirí a cheiliúradh agus chun an innealtóireacht a fhiosrú trí ghníomhaíochtaí agus seónna spraíúla, chomh maith le bualadh le hinnealtóirí chun níos mó a fhoghlaim faoin domhan mórthimpeall orainn, ról na hinnealtóireachta inár saol a thuiscint mar aon lena tionchar ar ár dtodhchaí.”

I rith an lae beidh deis ag teaghlaigh a dtuirbín gaoithe féin a thógáil; tuiscint bhunúsach a fháil ar ról agus struchtúr ceall agus DNA le Taiscéalaithe na gCeall; bithábhar a thógáil ag baint úsáid as sláthach; spraoi le priontáil 3D; foghlaim conas rothair a dheisiú le cabhair ón Meitheal Rothar; breathnú ar an GEEC: Carr na Gaillimhe atá Tíosach ar Fhuinneamh; spraoi i limistéir shúgartha LEGO nó STEM; nó sos a ghlacadh sa seomra céadfach. 

Is féidir le lucht freastail a gcuid scileanna tiomána agus braistintí guaise a chleachtadh ar ionsamhlóirí gluaisteán, gluaisrothair nó rothair den scoth a chuirfidh an tÚdarás um Shábháilteacht ar Bhóithre ar fáil.

Beidh na gníomhaíochtaí seo agus go leor gníomhaíochtaí eile a thaispeánann saol na hinnealtóireachta sibhialta, comhshaoil, meicniúla, bithleighis, leictreonaí, fuinnimh agus ríomhaireachta ar fáil ar an lá. 

Tá clár iomlán imeachtaí an Lae Spraoi Teaghlaigh ar fáil ag www.universityofgalway.ie/engineersweek/.

Tá ticéid saor in aisce, agus is féidir iad a chur in áirithe do roinnt seónna roimh ré ar an láithreán gréasáin. Moltar do theaghlaigh freisin teacht ar an lá, agus tabharfar tús áite dóibh siúd is túisce a bheidh i láthair.

Críoch