December Oíche Eolais Ollscoil na Gaillimhe do Mhic Léinn Lánfhásta agus d’Fhoghlaimeoirí Fásta

Tá Ionad Rochtana Ollscoil na Gaillimhe ag reáchtáil a oíche eolais bhliantúil, agus i mbliana díreofar ar riachtanais na mac léinn lánfhásta agus na bhfoghlaimeoirí fásta atá ag smaoineamh ar thabhairt faoi staidéar lánaimseartha nó páirtaimseartha.

Beidh an oíche eolais ar siúl Dé Céadaoin, an 15 Eanáir ó 6.30pm-9pm san Institiúid Cúrsa Saoil agus Sochaí (Áras ILAS), Bóthar an Chaisleáin Nua Uachtarach, Ollscoil na Gaillimhe.

Tá an ócáid dírithe go háirithe orthu siúd atá 23 bliain d’aois nó níos sine atá ag iarraidh tuilleadh eolais a fháil faoi na roghanna staidéir atá ar fáil in Ollscoil na Gaillimhe.

Beidh deis ag an lucht freastail deiseanna a phlé le mic léinn lánfhásta reatha agus le saineolaithe na gcúrsaí a chabhróidh leo cinneadh a dhéanamh faoi na roghanna is fearr a oireann dá gcúinsí pearsanta agus dá riachtanais forbartha gairmiúla.

            Bhí an méid seo le rá ag Kathleen Hartigan, Oifigeach na Mac Léinn Lánfhásta in Ionad Rochtana Ollscoil na Gaillimhe: “Chonaiceamar thar na blianta go mbíonn mic léinn lánfhásta díograiseach agus spreagtha chun foghlama, agus cuireann a ndúil san fhoghlaim go mór le pobal an champais. Táimid tiomanta an t-eolas atá de dhíth orthu a chur ar fáil dóibh le go mbeidh siad in ann an rogha oideachais is oiriúnaí dóibh féin a dhéanamh in Ollscoil na Gaillimhe.”

Beidh baill den Ionad Rochtana ar fáil chun ceisteanna a fhreagairt faoi chúrsaí réamh-ollscoile ar nós cúrsaí Rochtana/Bonnchúrsaí. Beidh foireann na Seirbhísí Tacaíochta Míchumais, a bhfuil saineolas acu faoin gcaoi tacú le mic léinn a bhfuil riocht sláinte (fisiciúil nó meabhrach) fadtéarmach orthu, nó a bhfuil deacracht shonrach foghlama acu, i láthair chun treoir a thabhairt do mhic léinn ionchasacha.

Cuirfidh Ionad Forbartha Gairmeacha na hOllscoile eolas ar fáil maidir le conairí gairme agus conas aistear oideachais agus gairme a phleanáil. 

            Dúirt Nuala McGuinn, Stiúrthóir an Ionaid Foghlama agus Forbartha Gairmiúla d’Aosaigh, Ollscoil na Gaillimhe: “Is iomaí dul chun cinn teicneolaíochta atá feicthe againn a chuireann atheagar ar fhorbairt an fhórsa saothair i dtionscail éagsúla. Tá tionchar ag na hathruithe seo ar an gcaoi a bhfoghlaimíonn daoine, a n-oibríonn siad agus a bhforbraíonn siad a gcuid scileanna. Cibé an bhfuil cúrsa micridhintiúr gearrthéarmach nó cúrsa solúbtha páirtaimseartha á lorg agat – ag leibhéal fochéime nó iarchéime – tá ár bhfoireann ar fáil chun roghanna a phlé leat.”

Ní mór clárú don ócáid seo. Cláraigh anseo nó seol ríomhphost chuig maturestudents@universityofgalway.ie

Tá tuilleadh eolais le fáil ag https://universityofgalway.ie/mature/

Críoch