August Taighdeoirí ag Lorg Rannpháirtithe le haghaidh Suirbhé ar Phacáistíocht Bhia Mara

Tá suirbhé seolta ag taighdeoirí in OÉ Gaillimh agus in Institiúid Teicneolaíochta Bhaile Átha Luain chun tuiscint níos fearr a fháil ar eolas tomhaltóirí ar phacáistíocht bhia mara agus ar bhainistíocht a dramhaíola. Tá an suirbhé á dhéanamh go comhuaineach sa Spáinn agus sa Phortaingéil agus tá sé á stiúradh ag Institiúid Mara agus Atmaisféir na Portaingéile.

Tá Éire ar na tíortha a bhfuil na leibhéil is ísle iontu maidir le tomhailt bhia mara in Iarthar na hEorpa, agus tá treochtaí tomhailte le sonrú inti atá an-éagsúil le macasamhail tíortha eile. Cuir i gcás, is gnách go dtomhlaítear líon níos airde de bhia mara atá pacáistithe nó reoite ar an méan in Éirinn, san áit a dtomhlaítear bia mara úr i dtíortha Eorpacha eile. In 2017, measadh gurbh é 23 kg/capita an tomhailt bhia mara in Éirinn. Sa Phortaingéil, tá an ráta tomhailte is mó maidir le bia mara san Eoraip mar atá 57 kg/capita.

Bainfear úsáid as torthaí an tsuirbhé le cuidiú le tuiscint níos fearr a fháil ar na difir idir tomhailt bhia mara agus bainistíocht dramhaíola in Éirinn, sa Spáinn, agus sa Phortaingéil. Ar deireadh thiar, tacóidh na torthaí le polasaithe poiblí a fhorbairt, polasaithe a chuirfidh chun cinn an úsáid éifeachtúil as pacáistíocht bhia mara.

Is mar chuid de NEPTUNUS an staidéar seo, tionscadal i Limistéar an Atlantaigh atá á mhaoiniú ag Interreg a bhfuil d’aidhm aige tacú le forbairt na hearnála bia mara i limistéar an Atlantaigh (Éire, an Fhrainc, an Spáinn, an Phortaingéil, agus an Ríocht Aontaithe) trí bhíthin uirlisí le haghaidh éic-lipéadaithe agus straitéisí le haghaidh táirgthe agus tomhailte a fhorbairt.

Bhí an méid seo le rá ag an Dr Eoghan Clifford, léachtóir sinsearach i gColáiste na hEolaíochta agus na hInnealtóireachta in OÉ Gaillimh agus príomh-imscrúdaitheoir NEPTUNUS: “Mar gheall ar na difir mhóra maidir le tomhailt agus cineál na dtáirgí bia mara a cheannaítear is féidir go mbeidh torthaí an tsuirbhé seo ina gcuidiú chun an bhearna eolais sna treochtaí a bhaineann le tomhailt bhia mara, iompar, agus eolas ar phacaistíocht bhia mara in Éirinn a líonadh. Beidh na torthaí seo úsáideach do lucht déanta polasaithe agus do thaighde amach anseo ar an gcaoi ar féidir le tomhaltóirí na hÉireann a n-iontógáil den bhia folláin seo a mhéadú agus cur lena dtuiscint ar phacáistíocht bhia mara."

Tá an suirbhé, ina bhfuil 25 ceist agus nach nglacann 10 nóiméad le líonadh ar fáil i nGaeilge: https://survey.ipma.pt/index.php/597922?newtest=Y&lang=ie , agus i mBéarla: https://survey.ipma.pt/index.php/597922?newtest=Y&lang=en

Le tuilleadh eolais a fháil faoin tionscadal téigh chuig www.neptunus-project.eu

-Críoch-